Britania dhe Gjermania përkrahin integritetin, dënojnë dhunën

Ne theksojmë domosdoshmërinë për të respektuar integritetin territorial të Kosovës dhe për tu përmbajtur nga akte tjera të dhunës

Sekretari i Jashtëm britanik, William Hague dhe Ministri i Jashtëm gjerman, Guido Westerwelle kanë theksuar se janë “seriozisht të brengosur” në lidhje me dhunën që ndodhi në kufirin mes Kosovës dhe Serbisë.

“Ne jemi të brengosur seriozisht për dhunën e fundit të ndodhur në kufirin mes Serbisë dhe Kosovës. Ne bashkërisht dënojmë çdo lloj akti të dhunës. Ne theksojmë domosdoshmërinë për të respektuar integritetin territorial të Kosovës, për tu përmbajtur nga akte tjera të dhunës dhe nga hapa tjerë që mund të kenë ndikim negativ në stabilitet dhe siguri”, kanë deklaruar dy ministrat në një komunikatë të përbashkët për medie.

“Në këtë aspekt, ne e përkrahim në mënyrë aktive dhe plotësisht dialogun e ndërmjetësuar nën direktivat e Zonjës Ashton në emër të Bashkimit Evropian. Dialogu ofron mundësi qenësore për të gjetur zgjidhje paqësore për çështjet e pazgjidhura në mes të Beogradit dhe Prishtinës, dhe për të vazhduar rrugën, si Serbia ashtu edhe Kosova, drejt një të ardhmeje të sigurt në BE”, kanë thënë ndër të tjera, ministrat.

“Ne e kemi thënë edhe më herët dhe po e ritheksojmë tani se mënyra se si fqinjët i zgjidhin problemet, është çelës kyç për një perspektivë evropiane. Andaj, Serbia dhe Kosova duhet të përqendrohen në dialogun e ndërmjetësuar nga BE, në të gjashtë problemet që tashmë janë duke u diskutuar sikurse edhe në progresin në veriun e Kosovës. Progresi i dukshëm në të gjitha këto fusha do të luajë rol në diskutimet e BE-së në vjeshtë”, theksuan dy homologët, ai britanik dhe ai gjerman.