Policët që e vranë Anis Amrin, heronj të ditës në Itali

Për këtë veprim policët italianë janë konsideruar si heronj të ditës: Në Facebook dhe Twitter Movio dhe Scata kanë marrë urime të shumta

Të dy policët italianë, Christian Movio dhe Luca Scata, gjatë natës së sotme kanë qëlluar në Milanos të dyshuarin për atentatin e të hënës në Berlin, Anis Amri, i cili la të vdekur 9 persona dhe mbi 50 të lënduar. I gjithë populli italian u gëzohet heronjve të vet.
Gjatë natës së mbrëmshme të dy policët italianë, Christian Movio (36) dhe Luca Scata (29), kishin dalë në terren duke bërë kontroll rutinor në rrugët e Milanos.  Pranë Piazza Maggio, në Sesto San Giovanni, shohin duke ecur një person.

Në momentin kur e ndalojnë dhe ia kërkojnë dokumentet, ai nxjerr pistoletën dhe e qëllon policin Movio në shpatull.  Bashkëpolici i Movios, Scata, i kundërpërgjigjet me shpejtësi dhe e qëllon me armë personin e panjohur, duke e lënë të vdekur. Më pas merret vesh se personi i vdekur ishte atentatori i Berlinit, Anis Amri, shkruan “blick.ch”.

Për këtë veprim policët italianë janë konsideruar si heronj të ditës:  Në Facebook dhe Twitter Movio dhe Scata kanë marrë urime të shumta. Një nga miqtë e policit Scata i shkruan në Facebook: “Jam krenar që kam një shok si ti”, apo mesazhe të tjera si: “Luca, ju keni bërë diçka madhështore, por më e rëndësishme është se ju jeni shëndosh”, përgëzojnë ata, përcjell “albinfo.ch”.
Ministri i brendshëm italian ka vlerësuar lartë të dy policët: “Italia duhet të jetë krenare për ju. E përsëris: Duhet të jetë krenare”, ka thënë ai gjatë ditës së sotme.

Polici i plagosur Christian Movio sot në mëngjes është operuar në sup. Sipas informacioneve të fundit, gjendja e tij është jashtë rrezikut për jetë.