Pikat doganore 1 dhe 31, ekzistenciale për Prishtinën, thotë Thaçi

Kryeministri Hashim Thaçi, i ka rikujtuar Serbisë, por edhe Bashkimit Evropian se prekja e kufirit të Kosovës, mund të hapë temën e kufijve në gjithë rajonin e Ballkanit.

Ai ka deklaruar se çdo shtet në rajonin tonë e ka një problem sikur problemi i Mitrovicës.

Thaçi, këto komente i bëri në mbledhjen urgjente të Qeverisë, pas takimit treorësh që ka zhvilluar me ndërmjetësin e Bashkimit Evropian në bisedimet Kosovë-Serbi, Robert Cooper. Thaçi ka thënë se edhe në takimin me Cooper-in, ka prezantuar qëndrimin e qartë të Prishtinës sa i përket dialogut.

Ai ka bërë të ditur se në këtë takim, diplomatit evropian i ka bërë të qartë se nuk do të ketë kthim prapa në gjendjen para 25 korrikut, nuk ka kthim në gjendjen e status quos, dhe se institucionet e Kosovës vetëm e kanë ushtruar të drejtën kushtetuese për të vendosur reciprocitetin tregtar dhe kontrollin në pikat kufitare 1 dhe 31.

Në këto pika, Thaçi ka thënë se Policia dhe Doganat e Kosovës do t’i kryejnë detyrat sipas Kushtetutës dhe ligjeve të vendit.

Çështja e pikave doganore 1 dhe 31, sipas Thaçit, mund të jenë çështje politike dhe elektorale, por për Prishtinën kjo është çështje ekzistenciale.

Kreu i ekzekutivit të vendit ka theksuar se Kosova është e vendosur në rrugën drejt integrimeve evropiane, por i ka bërë të qartë Bashkimit Evropian se duhet të jetë i qartë në raport me Kosovën në këtë drejtim.

Sa i përket çështjes së EULEX-it, Thaçi ka thënë se edhe në takimin me ndërmjetësin e BE-së është theksuar se ky mision duhet të respektojë, ligjet, Kushtetutën dhe institucionet e Republikës së Kosovës. Thaçi ka thënë se të gjithë e dëshirojnë një EULEX të suksesshëm, por ai sukses arrihet me angazhimet e përbashkëta me institucionet e Kosovës.