Reagon sërish Banka Kombëtare e Zvicrës për të stabilizuar frangun

Banka Kombëtare e Zvicrës (SNB) ka ngritur depozitat bankare nga 80 miliardë në 120 miliardë franga

Pas natës së fundit kur frangu zviceran gati ishte barazuar me vlerën e euros, pasi që investitorët kanë vazhduar që ta blejnë këtë valutë pas rënies së aksioneve në bursat botërore dhe nga frika e krizës së re financiare në disa shtete të Evropës, Banka Kombëtare Zvicrës (SNB) ka vendosur të ndërhyjë sërish të mërkurën kundër vlerësimit të tepërt të valutës zvicerane duke ngritur depozitat bankare nga 80 miliardë në 120 miliardë franga.

“Forcimi i tepërt i frangut kërcënon të ardhmen e ekonomisë dhe veçanërisht stabilitetin e çmimeve ndërsa qëllimi kryesor SNB-së është të vazhdojë të monitorojë nga afër zhvillimet në tregjeve financiare. Nëse është e nevojshme, do të marrin masa shtesë kundër forcimit të frangut”, thuhet në një deklaratë të SNB-së.

Masat e marra të Bankës Kombëtare Zvicerane ndikuan që frangu të rritet të mërkurën nga 1.01 në 1.05, për të pësuar sërish rënie në 1.04 krahas euros.

Banka Kombëtare Zvicerane përdori këtë instrument për herë të parë që nga viti 2008.

Javën që shkoi Banka Qendrore e Zvicrës kishte reaguar për herë të parë duke ulur interesin kreditor për bankat dhe kishte lëshuar në treg një sasi të frangut zviceran me qëllim të ngritjes të devizave të huaja.