Etiketa të rreme

Konsumim: Brukseli do të ndalojë 2200 etiketa, të cilat shfaqin pretendime mashtruese në paketimin e ushqimit.

E përditshmja “Le matin” ka trajtuar një temë, e cila prek të gjithë konsumatorët: Paketimin dhe të dhënat e produkteve ushqimore. Deri më sot premtime të llojllojshme afishohen në këto paketime. Duket se në të ardhmen gjërat do të ndryshojnë.

Industria ushqimore e Bashkimit Evropian do të ketë për detyrë  pastrimin e etiketave dhe paketimin, duke tërhequr më shumë se 2200 etiketa mashtruese ose të rreme, ka shpallur Komisioni Evropian. “Kjo është për të rregulluar një treg aktualisht të errët”, ka nënvizuar John DALLI, komisionar për Shëndetësi dhe Mbrojtje të Konsumatorit.

Edhe në Zvicër do të ketë ndryshime

Ky inventar do të ketë pasoja edhe në Zvicër. “Zvicra do  të përdorë këtë listë pas miratimit zyrtar nga Bashkimi Evropian”, ka konfirmuar Katrin Holenstein, zëdhënëse për Zyrën Federale të Shëndetit Publik në Bernë.

Premtime të tilla, si “nxit sistemin imunitar”, “mirë për kolesterolin,” “forcon eshtrat” ose “lehtëson qarkullimin e gjakut”, tani mund të lejohen vetëm nëse saktësia e tyre është demonstruar, ka theksuar Lucia de Luca, zëdhënëse e Autoritetit Evropian të Sigurisë Ushqimore (EFSA në anglisht). Kjo organizatë ka studiuar rreth 2760 etiketa gjatë këtyre tre vjetëve dhe del me një konkluzion të ashpër: vetëm 510 etiketa, më pak se 20%, dëshmojnë shkencërisht se ajo që premtohet është e vërtetë.

“Kjo nuk do të thotë se produkti nuk është i mirë, por që premtimet në etiketë nuk janë të sakta”, dëshiron të sqarojë zonja De Luca.