“Nota të dobëta” në politikën për të huajt

Në shkallën e vlerësimit prej 0 deri në 10, kryetari i SVP/UDC, Brunner ka fituar notën 4.11 ndërsa kolegu i tij partiak, Blocher, 4.15

Politikanët të cilët profilin e tyre e kanë ndërtuar kryesisht mbi rrezikun nga të huajt, duket të kenë më pak kompetencë profesionale pikërisht në problematikën e të huajve. Këtë konstatim e ka sjellë sondazhi i realizuar nga instituti “Demoscope” me porosi të gazetës “SonttagsBlick”.

Kështu, notat më të dobëta për aftësinë e tyre për zgjidhjen e problemeve të migracionit, sipas lexuesve të anketuar, i kanë merituar politikanët kryesorë të SVP-së (UDC), Toni Brunner dhe Christoph Brunner.

Në shkallën e vlerësimit prej 0 deri në 10, kryetari i partisë, Brunner ka fituar vetëm notën 4.11 ndërsa kolegu i tij i vjetër partiak, Blocher, 4.15.

Notat më të mira për aftësinë që të zgjidhin problemet e migracionit u janë ndarë dy politikaneve femra të dy blloqeve të ndryshme. Drejtoresha e policisë në kantonin St. Gallen, Karin Keller-Sutter që vjen nga Partia Liberale (FDP), me notën 6.16 është vlerësuar më së shumti nga të anketuarit.

Vetëm pak prapa saj është ministrja aktuale e drejtësisë, politikania socialdemokrate Simonetta Sommaruga, e cila ka marrë notën 6.14.

Veç politikanëve të përmendur më lartë, në listë kanë qenë edhe 12 politikanë tjerë zviceranë. Me nota të mira, (5.12) lexuesit e anketuar kanë vlerësuar politikanin Urs Schwaller, shefin e fraksionit të CVP-së në parlament. Kryetarit të partisë së këtij të fundit, Christophe Darbellay ata ia kanë dhënë notën 5.05.

Sondazhi është realizuar nga 8 deri më 16 gusht dhe në të kanë marrë pjesë 1002 shtetas zviceranë të pjesës gjermane dhe asaj franceze.