Zbehet interesimi për të kërkuar azil

Ka shënuar rënie numri i azilkërkuesve nga Maqedonia. Vetëm 10 persona janë regjistruar gjatë gushtit

Në muajin prill ishin regjistruar 725 qytetarë që kanë bërë kërkesat e azilit në Suedi, Zvicër, Belgjikë, Holandë dhe Gjermani.

Këto të dhëna i ka bërë publike Ministria e Punëve të Jashtme e Maqedonisë (MPJ).

Sipas tyre gjatë katër muajve të fundit ka pasur rënie drastike të qytetarëve që kanë kërkuar të drejtën e azilit, njoftojnë mediet në Shkup.

Autoritetet maqedonase pohuan se gjatë katër muajve të fundit për 70 herë është zvogëluar  numri i azilkërkuesve që kishin destinacion vendet e Evropës.

BE-ja ka dhënë vlerësime pozitive pasi që ka ndjekur situatën me shtetasit e Maqedonisë.

Zyrtarët që po merren me vëzhgimin e procesit të liberalizimit në Maqedoni theksuan se kjo situatë ka rezultuar pas vendosjes së masave rigoroze ndaj qytetarëve lidhur me respektimin e procesit të liberalizimit.

Masat e reja rigoroze përforcuan kontrollet në pikat kufitare, kontrollet pranë agjencive turistike dhe shpalljen e dënimeve rigoroze për të gjithë azilkërkuesit e rrejshëm që zbulohen nëpër vendet e BE-së.

Gjermania, Holanda, Zvicra deri tani asnjë qytetari nga Maqedonia nuk i kanë pranuar kërkesën për azil, derisa Suedia ka pranuar vetëm dy shtetas me të drejtën e azilit.