Prezantohet projekti për parkun në Kleçkë-Divjakë

Ministria e Mjedisit dhe Planifikimit Hapësinor dhe Kuvendi Komunal i Lipjanit ditën e mërkurë e kanë prezantuar para qytetarëve të kësaj komune, planin për ndërtimin e parkut historik-kulturor dhe vlerat natyrore në hapësirën Kleçkë – Divjakë.

Janë bërë më shumë se një vit që kur Qeveria e Kosovës e pati shpallur zonë të interesit të përgjithshëm kombëtar vendbanimin ku ishte i vendosur Shtabi i Përgjithshëm i UÇK-së në Kleçkë dhe Divjakë.

Si propozuese e këtij projekti, tashmë MMPH ka bërë përgatitjet e duhura dhe ditë më parë ka hapur shqyrtimin publik të planit, që do të përfshijë komunën e Drenasit, Malishevës dhe Lipjanit.

Zëvendësministri i Mjedisit dhe Planifikimit Hapësinor, Shpejtim Rudi ka theksuar se me projektin për shpalljen e zonave me interes të veçantë në Kleçkë dhe Divjakë, synohet ruajtja e vlerave të rëndësishme historike të Kosovës, por edhe rritja ekonomike e popullatës së asaj ane.

Gjatë prezantimit që është bërë në Kuvendin Komunal të Lipjanit, si prika kryesore të projektit dolën të jenë, selia që shfrytëzonte atëbotë Qeveria e Përkohshme, ajo e Shtabit të Përgjithshëm të UÇK-së, spitalit ushtarak, pastaj lapidari dhe varrezat e dëshmorëve, Shtabi i Brigadës 121, si dhe muzeu për Radio Kosovën e Lirë.

Sipas planifikimeve të bëra në prezantimin e sotëm në Lipjan parku kap një hapësirë prej 1500 hektarësh, mirëpo ai do të zgjerohet më vonë edhe me 3 922 hektarë të tjerë.