Ministri Beqaj u takua me ekspert të Bankës Botërore

Ministri i Zhvillimit Ekonomik Besim Beqaj, ka takuar përfaqësuesit e Bankës Botërore dhe Panelit të ekspertëve të pavarur të caktuar nga Banka Botërore për të shqyrtuar projektin “Kosova e Re” nga pikëpamja e Kornizës Strategjike për Zhvillim dhe Ndryshime Klimatike.

Gjatë takimit janë shqyrtuar temat që kanë të bëjnë me burimet e ri përtëritshme, efiçiencën e energjisë, dhe bashkëpunimit më të madh rajonal në shkëmbimin e energjisë me qëllim të optimizmit të sistemeve elektroenergjetike.

Roli i Panelit të Ekspertëve i përbërë nga tre ekspertë eminent ndërkombëtarë, është të shqyrtoj projektin krahas gjashtë kritereve të përcaktuara në Kornizën Strategjike për Zhvillim dhe Ndryshime Klimatike.

Këto kritere përfshijnë ndikimin e demonstruar të projektit në zhvillim siç është përmirësimi në përgjithësi i sigurisë së furnizimit me energji, reduktimi i mungesës së energjisë dhe qasja në energji nga të varfrit.

Kriteret tjera janë edhe ofrimi i asistencës për identifikimin dhe përgatitjen e projekteve me emitim të ulët të karbonit, optimizmi i burimeve energjetike duke shqyrtuar mundësinë për të kënaqur nevojat e vendit për energji elektrike përmes efiçiencës dhe ruajtje.

Konsideratë për alternativat e arsyeshme me kosto më të ulët dhe shtjerja e mundësive për financim nga donatorët, dizajni i projekteve të bazuara në djegie të linjiti bazuar në teknologjinë më të përshtatshme në dispozicion duke mundësuar për efiçiencë të lartë, dhe për këtë, intensitetin më të ulët të emitimeve të gazrave të efektit serë dhe përfshirjen e ndikimeve të jashtme mjedisore në analizën e projektit.

Paneli i ekspertëve do të qëndroj edhe disa ditë në Prishtinë ku do të takohet edhe me institucionet tjera që bashkëveprojnë në sektorin e energjisë. Me rekomandimet e panelit do të informohet Grupi i Bankës Botërore për mbështetjen e vazhdueshme të sektorit të energjisë në Kosovë.