Vendet e BE-së do të komunikojnë më lirë në roaming

Zyrtarët nga 28 vendet e Bashkimit Evropian (BE) dhe Parlamenti Evropian arritën një marrëveshje për uljen e çmimit të thirrjeve roaming, njoftuan mediat në Bruksel, përcjell albinfo.ch.

Ata ranë dakord se si operatorët mobilë mund të ngarkojnë njëri-tjetrin për përdorimin e rrjetit të tyre dhe do të ofrojnë shërbimin roaming, me të cilin do të reduktohet ndjeshëm kostoja për përdoruesit e këtyre shërbimeve, shkruan albinfo.ch.

Deri më tani qytetarët e BE-së kanë paguar shërbime të larta roaming kur vizitojnë ose punojnë në një shtet tjetër anëtar. Për një kohë të gjatë është konsideruar si një faktor që komplikon tregun e përbashkët në mes të shteteve anëtare.

Kjo masë ende duhet të marrë edhe kuadrin ligjor, e pastaj do të duhet të miratohet nga shtetet anëtare të BE-së, por arritja e pozicionit të përbashkët është konsideruar si një hap i rëndësishëm.