Mosvotimi i reformës tatimore, “shuplakë” për kompanitë e huaja?

FAZ: "Zviceranët kanë fundosur reformën e tatimeve të ndërmarrjeve, të propozuar nga qeveria dhe kështu i kanë bërë një shërbim të keq vendit të tyre"

Përgjigja negative bindëse që ka marrë nga populli votues iniciativa për reformimin e sistemit tatimor (USR-III), ka ngritur shqetësime në opinionin e Zvicrës. Kjo për faktin se një refuzim i tillë shihet veç tjerash si shuplakë ndaj veprimit të kompanive të huaj në Zvicër.

Edhe ministri i financave, Ueli Maurer është shprehur i brengosur me rezultatin e votimit. Por ai, në reagimin e parë pas referendumit ka thënë për mediat se njëherë për njëherë legjislacioni mbetet i tillë çfarë është, raportojnë mediat zvicerane. Privilegjimi i kompanive të mëdha të huaja do të vazhdojë.

Ndonëse OECD ka thënë se Zvicra nuk rrezikohet që menjëherë të futet në një listë të zezë, megjithatë asaj i kanosen masat ndëshkuese nga vende të veçanta, transmeton albinfo.ch. Veç kësaj tash mbretëron një pasiguri se çfarë mund të ndodhë ndërkohë gjatë dy viteve sa parashihen deri në ndryshimin e pritur. Ka rrezik që kompanitë gjatë kësaj kohe të braktisin Zvicrën.

Edhe mediat e huaja janë marrë me votimin e përmendur në Zvicër. Kështu gazeta gjermane “Frankfurter Allgemeine Zeitung” shkruan se “zviceranët kanë fundosur reformën e tatimeve të ndërmarrjeve, të propozuar nga qeveria. Kjo është e hidhur, pasi që drejtimi që kishte marrë reforma dukej i mirë. Ndonëse reforma e përmendur, fillimisht do t`i sillte të ardhura shtetit, por në afat të gjatë ajo rrit shansin për të tërhequr investime të reja në vend. Bota nuk e pret Zvicrën. Në SHBA dhe në Britaninë e Madhe po bëhen ulje të shkallës së tatimeve për kompanitë e huaja ndërsa Zvicra mund të jepte një sinjal në atë drejtim. Por, votuesit në vend të kësaj, me hedhjen poshtë të reformës i bënë një shërbim të keq vendit të tyre”, përcjell albinfo.ch.

Ngjashëm, me ton kritik shkruan edhe britanikja “Financial Times”. “Humbja është një goditje për lobin e ndërmarrësve në Zvicër, të cilët duhet të frikësohen nga pasiguria që i pret lidhur me tatimet në të ardhmen. “Jo”-ja e papritur dhe bindëse të bën të mendosh se atmosfera globale Anti-Establishment e ka arritur Zvicrën.