Serbët reagojnë për marrëveshjen për vulat

"Serbët në veri nuk do të pranojnë doganierët shqiptarë", ka theksuar Udhëheqësi i institucioneve serbe në veri, Radenko Nedelkoviq

Marrëveshja e Brukselit për vulat doganore të Kosovës ka shkaktuar reagime kontradiktore te serbët. Opozita e cilëson këtë vendim si një hap tjetër të Beogradit drejt humbjes përfundimtare të Kosovës.

Përfaqësuesit e partive në pushtet e kanë mbështetur marrëveshjen e arritur në Bruksel me shpjegimin se edhe më tej respekton integritetin territorial të Serbisë. Por ndryshe mendojnë përfaqësuesit e strukturave paralele serbe në veri të Kosovës. Ata thonë se “do të vazhdojnë luftën që ky vendim të mos futet kurrë në fuqi”, në pikëkalimet kufitare Jarinje dhe Bërnjak.

Udhëheqësi i institucioneve serbe në veri të Mitrovicës, Radenko Nedelkoviq ka deklaruar se vendimi i Beogradit duhet të kuptohet në kontekstin e përpjekjeve për afrim me BE-në. “Serbët në veri nuk do të pranojnë doganierët　shqiptarë”, ka theksuar ai.

Njëjtë janë shprehur edhe përfaqësuesit e komunave serbe në Leposaviq dhe Zubin Potok. Kryetari i komunës paralele serbe në Zubin Potok, Sllavisha Ristiq ka deklaruar se “ky është edhe një mashtrim tjetër i Beogradit”, sepse njohja e këtyre vulave do të thotë “vulë e dorëzimit të Kosovës”.

Ish shefi i delegacionit serb në negociatat e Vjenës, Sllobodan Samarxhiq nga Partia Demokratike Serbe e Vojisllav Koshtunicës, ka thënëa se “delegaconi serb ka kapitulluar në Bruksel”.

Kryetari i liberalëve Çedomir Jovanoviq mendon ndryshe. Ai ka vlerësuar se vendimi për njohjen e vulave ka kuptim, vetëm në qoftë se përfundimisht vendoset një pikë në politikë e gabuar serbe ndaj Kosovës.