Jahjaga:Komuniteti shqiptar në Zvicër, urë lidhëse mes dy vendeve

Presidentja e Republikës së Kosovës, Atifete Jahjaga priti në një takim lamtumirës ambasadorin e Zvicrës në Kosovë, Lucas Beglinger

Ambasadori Beglinger theksoi se ka kujtime të mira nga koha e qëndrimit të tij në Kosovë. Ai theksoi se Zvicra ka një raport të veçantë me Republikën e Kosovës, njofton presidenca e Kosovës.

Beglinger gjithashtu përkujtoi se Zvicra ka angazhime të shumëfishta në Kosovë, si në kuadër të KFOR-it, ICO-s, EULEX-it dhe në projekte të tjera, në ndihmë popullit dhe shtetit të Kosovës.

Presidentja Jahjaga falënderoi ambasadorin Beglinger për bashkëpunimin dhe kontributin e madh që ka dhënë gjatë qëndrimit të tij në Kosovë.

Ajo theksoi se Kosova dhe Zvicra kanë një bashkëpunim shumë të mirë mes tyre, bashkëpunim ky që do të intensifikohet edhe më tej në të ardhmen.

Jahjaga gjithashtu tha se komuniteti shqiptar në Zvicër do të vazhdojë edhe më tej të jetë urë lidhëse mes dy vendeve tona.