Shpërthime dhe breshëri armësh në veri, kërkohet largimi i Stefanoviqit

Strukturat paralele serbe në veri kanë kërkuar largimin e Borisllav Stefanoviq nga detyra e shefit të ekipit negociator serb

Në mesnatë në rajonin e Zubin Potokut janë dëgjuar shpërthime dhe breshëri armësh. Nuk është raportuar asnjë plagosur dhe arsyeja e këtyre shpërthimeve është ende e panjohur.

Ushtarët e KFOR-it kishin bllokuar më parë rrugën kryesore alternative në komunën e Zveçanit në drejtim nga Novi Pazari, rrugë kjo rurale e njohur si një ndër rrugët me frekuentim më të madh të kontrabandimit të mallrave nga Serbia në Kosovë.

Pas bllokimit të rrugës dhe kamionëve, një numër i madh i serbëve kanë protestuar dhe bllokuar rrugët e tjera.

Lajmi për shpërthimet është konfirmuar nga TV Most

Kurse strukturat paralele serbe në veri kanë kërkuar largimin e Borisllav Stefanoviq nga detyra e shefit të ekipit negociator serb në bisedimet me Kosovën, ndërkohë që i kanë bërë thirrje Qeverisë së Serbisë që të angazhohet përmes Qeverisë ruse që në Kosovë të kthehen ushtarët rusë në kuadër të KFOR-it.

I ashtuquajturi kryetar i Këshillit Nacional serb Millan Ivanoviq, ka kërkuar ndërrimin e menjëhershëm të Stefanoviqit për shkak, siç u shpreh ai, dëmit që u ka shkaktuar serbëve të Kosovës me rastin e pranimit të vulave të shtetit të Kosovës.

Ai ka thënë se me aktin e pranimit të vulave, Serbia ka përjashtuar veten nga veriu i Kosovës në mënyrë tradhtare dhe se kjo sipas tij nënkupton definitivisht njohjen e shtetit të Kosovës.

Ivanoviq i ka bërë thirrje zëvendëskryeministrit serb Ivica Daqiq që të angazhohet përmes ambasadës dhe qeverisë ruse që në Kosovë të kthehen ushtarët rusë në kuadër të KFOR-it.