Riatdhesohet shqiptari pasi vuan dënimin

Në mars të vitit 2010 të riut shqiptar i ishte shqiptuar një dënim me heqje lirie për 40 muaj nga një gjykatë e Bernës

Është realizuar dje pa komplikime riatdhesimi në Shqipëri i një shtetasi shqiptar që kishte kryer dënimin për tregti me drogë në Zvicër.

Në mars të vitit 2010 të riut shqiptar i ishte shqiptuar një dënim me heqje lirie për 40 muaj nga një gjykatë e Bernës. Pas këtij dënimi, Enti për Migracion i kantonit të Bernës ia kishte hequr atij statusin e qëndrimit të përhershëm në Zvicër (vizën C) dhe kishte vendosur ta kthente në vendin e prejardhjes.

Shqiptari nuk kishte ushtruar ankesë kundër këtij vendimi. Në këto rrethana, ai, menjëherë me të vuajtur dënimin mundi të riatdhesohej. Dëbimi i tij nga Zvicra, ka rrjedhur pa asnjë inicident, kanë bërë të ditur të mërkurën autoritetet e kantonit të Bernës.

Ndaj personit të dëbuar është marrë edhe një masë ndalese të udhëtimit në Zvicër për kohë të pacaktuar.