20 vjetori i pavarësisë së Maqedonisë është shënuar në Bernë

Ambasadori i Maqedonisë në Bernë, Ramadan Nazifi ka prezantuar Maqedoninë si një vend që po kalon me sukses transformimet demokratike

Ambasada e Republikës së Maqedonisë në Zvicër, ka organizuar të enjten, më 6 shtator në Bernë, shënimin e njëzetvjetorit të pavarësisë së shtetit.

Në praninë e një numri të konsiderueshëm të diplomatëve të akredituar në Bernë dhe të mërgimtarëve nga Maqedonia në Zvicër, fjalën e rastit e ka mbajtur ambasadori, Ramadan Nazifi.

Të pranishëm ishin edhe ambasadori i Republikës së Kosovës, Naim Malaj, ambasadori i Republikës së Shqipërisë në misionin e OKB-së, Gjenevë, Sejdi Qerimaj dhe ai i Maqedonisë në po këtë mision, Aziz Pollozhani.

Ambasadori u është drejtuar mysafirëve në gjuhën angleze, gjermane dhe frënge. Ai, në fjalën e tij ka theksuar se “20 vjet më parë. Qytetarët tanë shprehën qartë vendimin e tyre për të lënë mbrapa sistemin e vjetër dhe të ecin në rrugën e tyre të re, të mëvetësishme, demokratike dhe të pavarur, të mirat e të cilit vendim ne po i gëzojmë sot”.

Nazifi pastaj ka prezantuar Maqedoninë si një vend që po kalon me sukses transformimet demokratike. “Sot Maqedonia është në rrugë të mirë që të bëhet shembull i një shteti demokratik prosperues, funksional, tolerant, multietnik e multireligjioz”, ka thënë ai.

Në vazhdim ambasadori Ramadan Nazifi i është drejtuar edhe bashkatdhetarëve nga Maqedonia. “Do ta shfrytëzoja rastin që të falënderoj të gjithë përfaqësuesit e diasporës, shoqatat dhe ndërmarrjet, për angazhimin e tyre dhe kontributin respektivisht organizimin e pritjes së sotme.

Është me të vërtetë nder i veçantë dhe kënaqësi që të kemi një diasporë të këtillë, kaq të zellshme, të organizuar mirë dhe solidare, e cila e di fare saktë se si duhet, vlerësohet dhe respektohet vendi i prejardhjes”, ka përfunduar ambasadori i Republikës së Maqedonisë, Ramadan Nazifi fjalën e tij përshëndetëse.

Mërgimtarët e Maqedonisë ishin kujdesur për një tryezë të pasur me ushqime tradicionale nga vendlindja, të kombinuara me ato nga Zvicra.

Krijuesja maqedonase Svetlana Mitreva ka lexuar një fragment në gjermanishte nga krijimtaria e saj, ndërsa një orkestër e vogël në prapavijë ka ekzekutuar valle instrumentale maqedonase.