Feith flet për “Ahtisaari Plus”

Ai ka propozuar që pjesa veriore e Kosovës të marrë një status autonomie të ngjashëm me atë që ka Katalonia në Spanjë.

Modeli më i ri për një zgjidhje afatgjate në Kosovë është “Ahtisaari Plus”, ka deklaruar shefi i Zyrës Civile Ndërkombëtare, Pieter Feith. Madje ai ka propozuar që pjesa veriore e Kosovës të marrë një status autonomie të ngjashëm me atë që ka Katalonia në Spanjë.

“Në Spanjë keni Kataloninë, për shembull – ajo është pjesë e Spanjës, por janë shumë autonomë”, ka thënë Feith në një deklarim për EUobserver.com.

Ai thuhet të ketë refuzuar të jape më shumë detaje rreth asaj se sa shumë përtej modelit të Ahtisaarit janë të vullneteshëm të shkojnë sponsoruesit e Zyrës Civile, Ndërkombëtare, kashkruar EUobserver.com.

Sipas Kohës Ditore, Feith citohet të ketë thënë edhe se situata e re e krijuar në veri dhe vrasja e policit kosovar, Enver Zymberi, atje, mund të shfrytëzohen edhe si rast për ndryshime.

“Ajo ishte shkundje e drurit, dhe ndoshta diçka e mirë mund të dalë prej saj”, ka thënë Feith, duke iu referuar vendimit të Qeverisë së Prishtinës për të dërguar njësitet speciale të policisë në veri, më 25 korrik.

“Nuk ka fort gjasa që t’i kthehemi situatës që ishte më parë. Diçka ka ndryshuar përgjithmonë”, ka theksuar ai.

Zëvendëskryeministri Hajredin Kuçi ka thënë për Kohën Ditore se Pakoja u garanton serbëve “të drejta të mjaftueshme dhe mundësi për të ruajtur identitetin nacional, e tjerë”. Sipas Kuçit, veriu ka nevojë për rend dhe ligj.