Kosovarët do të përkujtojnë 11 Shtatorin

Ministria e Punëve të jashtme e Kosovës do të organizojë një ceremoni përkujtimore për të nderuar viktimat e 11 Shtatorit

Në përkujtim të dhjetë vjetorit të sulmeve terroriste të 11 shtatorit 2001 në Shtetet e Bashkuara të Amerikës, ministria e punëve të jashtme e Kosovës, do të organizojë një ceremoni përkujtimore për të nderuar viktimat “e kësaj dite tragjike për SHBA-të dhe krejt botën demokratike”.

Ministria e jashtme ftoi qytetarët e Prishtinës që, “në shenjë nderimi për viktimat dhe solidarizimi me të mbijetuarit, familjet dhe kombin e madh amerikan”, të dielën me 11 shtator 2011, në ora 19:00, të ndezin qirinj para Teatrit Kombëtar të Kosovës, në qendër të Prishtinës.

“Populli i Republikës së Kosovës tashmë e ka shndërruar këtë përvjetor në ditë të kujtesës dhe respektit për Shtetet e Bashkuara të Amerikës, aleates themeltare të shtetësisë së Kosovës.Në këtë ditë, përmes akteve të bamirësisë dhe bashkimit të njerëzve të moshave, besimeve dhe përkatësive të ndryshme etnike, do të nderohen viktimat e sulmeve terroriste në mbarë botën”, thuhet ndër të tjera në komunikatën për shtyp të kësaj ministrie.