OEAK, deklarohet në mbështetje të biznesit

Oda Ekonomike Amerikane në Kosovë, kërkon nga KEK-u, që të vazhdojë me furnizimin me prioritet për bizneset e Kosovës

Oda Ekonomike Amerikane në Kosovë është shprehur e shqetësuar me paralajmërimet e fundit për heqjen e furnizimit të privilegjuar me energji elektrike për konsumatorët afaristë të përfshirë në kategorinë “A+”.

“Në rrethana kur Kosova rangohet në vend jo të favorshëm për bërje të biznesit në shumë raporte ndërkombëtare, përfshirë edhe raportin e Bankës Botërore për bërje të biznesit, është me rëndësi që kjo situatë të mos përkeqësohet edhe më tej”, thuhet në reagimin e OEAK-së.

Bizneset e Kosovës për vite të tëra janë përballur dhe vazhdojnë të përballen me vështirësi të shumta, si rezultat i problemeve të shkaktuara nga furnizimi jo i qëndrueshëm me energji elektrike.

Sipas Odës Amerikane…, më shqetësuese është se këto vështirësi e rëndojnë në mënyrë të veçantë sektorin e prodhimtarisë, për shkak se makineritë prodhuese kërkojnë një furnizim stabil, përndryshe dëmet që mund të shkaktohen janë të paparashikueshme si në aspektin material ashtu edhe në atë financiar.

“Prandaj Oda Ekonomike Amerikane në Kosovë, kërkon nga KEK-u, që të vazhdojë me furnizimin me prioritet për bizneset e Kosovës të cilat paguajnë për energjinë e konsumuar në avans. Ne u bashkohemi shoqatave të tjera të biznesit të cilat mbështesin secilin veprim të ndërmarrë nga institucionet përkatëse të cilat kanë për synim krijimin e kushteve më të mira për operimin e bizneseve të Kosovës”, thuhet ndër të tjera në reagim.