Kosova rrezikon të mbetet pa tokë bujqësore

Nëse vazhdohet me trendin aktual të ndërtimeve në tokat bujqësore, një ditë jo shumë të largët Kosova do të mbetet pa tokë bujqësore

Komisioni për Bujqësi, Pylltari, Zhvillim Rural, Mjedis dhe Planifikim Hapësinor, ka organizuar  dëgjim publik me temën “Mbikëqyrja dhe zbatimi i Ligjit për tokën bujqësore”, në të cilin u theksuan shumë parregullsi lidhur me trajtimin e tokave bujqësore nëpër komunat e Kosovës.

Gjetjet e raportit vëjnë në pahë se nëse vazhdohet me trendin aktual të ndërtimeve në tokat bujqësore, një ditë jo shumë të largët Kosova do të mbetet pa tokë bujqësore.

Kryetari i këtij komisioni, Nait Hasani ka shprehur shqetësimet e tij se në gjetjet e raportit nëpër komunat e Kosovës, e që fokusohet në shkeljen e ligjit, janë evidentuar humbje të mëdha të tokave bujqësore.

Ai ka theksuar se pasojë e madhe e humbjeve të tokave janë edhe ndërtimet pa leje, e që një ditë do të na lënë Kosovën pa tokë bujqësore. 

Ndërkaq kryesuesi i Nëngrupit të Komisionit për Tokën Bujqësore, Njazi Idrizi ka përmendur disa nga sfidat që i ka aktualisht toka bujqësore ne vendin tonë.

Gjetjet e këtij raporti kritikuan edhe kryetarët e komunave të cilët nuk kanë ndarë buxhet sa duhet për mbikëqyrjen dhe evitimin e destinimit të tokave bujqësore. 

Vërejtje tjetër ishte se trendi i ndërrimit të destinimit të tokave bujqësore po bëhet më së shumti afër rrugëve të asfaltuara, e që nuk figurojnë as në kadastra si parcela të ndara.

Po ashtu, raporti bën me dije se po të vazhdojë ky trend i destinimit të tokave bujqësore, një ditë do të mbetemi pa tokë bujqësore.