Nis zbarkimi në pikën 1 dhe 31

Ka nisur zbarkimi i doganierëve dhe policëve të Kosovës në pikëkalimet kufitare me Serbinë, Jarinje e Bërnjak. Pjesëtarët e EULEX-it janë parë në pikëkalimin kufitar Jarinje pak para orës tetë.

Bëhet e ditur se transporti i tyre deri atje është bërë me helikopterë, meqë rrugët janë të bllokuara nga banda të pjesëtarëve të komunitetit serb, të mbështetura edhe nga institucionet shtetërore të Serbisë, shkruajnë mediat e Kosovës.

Ushtarët e KFOR-it qysh mbrëmë, në orën 20, kanë mbyllur pikëkalimin kufitar në Jarinje, që ishte djegur nga protestues të komunitetit serb më 26 korrik.

Njoftohet se rruga është e mbyllur me tela gjemborë, ndërkaq pjesëtarët serbët kanë vendosur në rrugë kamionë dhe mjete të tjera të rënda ndërmjet Kosovës e Serbisë. Po ashtu pikëkalimi kufitar Bërnjak njoftohet se është i bllokuar me barrikada në të dy anët.

Protestuesit serbë e kaluan natën e mbrëmshme në barrikada, ndërkaq tash po vazhdon grumbullimi i tyre rreth barrikadave.

Ata gjatë natës i kanë vizituar i ashtu quajturi ministër për Kosovën, Goran Bogdanoviq, dhe shefi i ekipit negociator serb, Bosislav Stefanoviq, të cilët kanë hyrë në Kosovë ilegalisht.

Në urën kryesore mbi Ibër, në Mitrovicë, tashmë kanë filluar protestat e nxënësve serbë të shkollave të mesme dhe të punëtorëve të shëndetësisë.