Shtetet e BE-së nuk detyrohen të japin vizë humanitare

Në një vendim të Gjykatës Evropiane thuhet se refugjatët nuk kanë patjetër mundësi të re hyrjeje legale në BE

E drejta për vizë humanitare, ashtu sikurse edhe deri më tash, nuk është e garantuar për refugjatët që kërkojnë azil në vendet e BE-së.

Në një vendim të Gjykatës Evropiane thuhet se refugjatët nuk kanë patjetër mundësi të re hyrjeje legale në BE. Gjykatësit e gjykatës në fjalë, në Luksemburg vendosën që vendet anëtare të BE-së të përcaktojnë vetë, në bazë të juridiksionit kombëtar, nëse refugjatët e kërcënuar nga tortura dhe dhuna kanë të drejtë të marrin një vizë humanitare, shkruan dw.de. Sipas së drejtës evropiane ata nuk janë të detyruar për dhënien e vizës.

Ky vendim bën që një familje siriane nga Alepo me tre fëmijë minorenë të humba padinë. Kjo familje kishte aplikuar për një vizë 90-ditore në ambasadën belge në Bejrut, për shkak se në Siri ata kërcënohen nga tortura dhe vdekja. Ata donin të merrin vizën për të hyrë legalisht në Belgjikë për të aplikuar për azil.

Sipas argumentimit të bërë në gjykatë nga Zyra e të Huajve në Belgjikë, kjo familje synon të qëndrojë me vizë më gjatë se 90 ditë – sirianët duan të aplikojnë për azil në vend, sipas saj. Nga ana tjetër vendet e BE-së nuk kanë detyrimin të pranojnë të gjithë njerëzit, të cilët përjetojnë situata katastrofale.

Një prokuror i përgjithshëm i Gjykatës Europiane e kishte kundërshtuar këtë argumentim përmes një ekspertize që bëri bujë. Ai shkruan, se dhënia e vizës nga një vend është e parashikuar në rregulloret europiane, bazë është Karta e Të Drejtave të Njeriut të BE. Kjo e përcakton qartë të drejtën për azil dhe ndalion torturën, trajtimin çnjerëzor dhe denigrues -rreziqe reale për familje siriane, sipas prokurorit.