Nuk bisedohet për çështje të brendshme

Autoritetet e Kosovës i janë përgjigjur negativisht kërkesës së Serbisë për ta bërë temë dialogu çështjen e funksionimit të pikëkalimeve kufitare në Jarinjë dhe në Bërnjak.

Qëndrimi i përsëritur është se nuk do të diskutohet me askënd për rregullimin e brendshëm shtetëror, shkruan Koha Ditore.

Zëvendëskryeministrja Edita Tahiri, që është shefe e delegacionit kosovar në dialogun me Serbinë, ka thënë se çështja e shkëmbimit të mallrave me fqinjin verior është kryer më 2 shtator, kur është arritur edhe marrëveshja për njohjen e vulave të doganave.

Ajo i ka bërë thirrje Beogradit zyrtar për ta respektuar këtë marrëveshje dhe e ka porositur të mos harxhojë kohë pas kërkesave për dialogun e funksionimit të këtyre pikëkalimeve.

Sipas saj edhe në Bruksel ishte tentuar të qitej kjo në tryezën e dialogut.

“As që kemi diskutuar më herët, as nuk do të diskutojmë, sepse marrëveshja për tregtinë e lirë zbatohet nga shtetet në mënyrë të veçantë”, ka thënë zëvendëskryeministrja Tahiri. Ajo ka deklaruar se ekzistojnë rregullat e BE-së për këtë çështje, të cilat Kosova po i zbaton.Tema e njohjes së vulave të doganave është përmbyllur më 2 shtator në Bruksel, kur Serbia pranoi që në to të jetë e shkruar ngjashëm sikur ka qenë prej shpalljes së pavarësisë, “Doganat e Kosovës”.