Kërkohet mbrojtja e prodhimeve të vendit

Pas ndërprerjes së masave reciproke dhe lejimit të hyrjes së mallrave serbe në tregun kosovar, njohës të çështjeve ekonomike bëjnë thirrje që të ruhet ritmi i mbrojtjes së prodhimeve të vendit.

Eksperti Ismail Kastrati, i ka thënë Evropës së Lirë, se konsumatori kosovar duhet të orientohet kah prodhimet e vendit, duke shprehur bindjen se cilësia e tyre është në nivelin e duhur.

Sipas tij, për konsumimin e produkteve kosovare kërkohet angazhim i përbashkët i prodhuesve, qytetarëve, por edhe i ekzekutivit.

Ai ka deklaruar se shteti duhet t’i stimulojë prodhuesit vendorë dhe të krijojë një ambient më të përshtatshëm biznesor.

Edhe Ymer Havolli, nga Instituti ”Riinvest”, ka kërkuar nga Qeveria e Kosovës t’i ndihmojë prodhuesit vendorë.

Zyrtarë të qeverisë dhe njohës të çështjeve ekonomike kanë deklaruar se Serbia do ta ketë të vështirë të rimarrë tregun kosovar në përmasat që ka pasur para 20 korrikut, kur Qeveria e Kosovës ka vendosur masa reciproke ndaj produkteve serbe.

Gjatë periudhës së zbatimit të masave reciproke, sipas tyre, është vërtetuar se tregu kosovar nuk varet nga produktet serbe.