Marnak thërret serbët të heqin barrikadat

"Ne kemi ndërmarrë këtë veprim për të përmirësuar fluksin e mallrave dhe mundësinë e njerëzve për të pasur qasje në to"

Kreu i EULEX-it, Ksavier de Marnak, ka vizituar portat 1 dhe 31 në Jarinë dhe Bërnjak, ku ka takuar trupat e misionit evropian, të KFOR-it, të Policisë së Kosovës dhe të Doganave të Kosovës.

“Policia dhe Dogana e EULEX-it, duke punuar ngushtë me ushtarët e KFOR-it, janë këtu për të mbështetur sundimin e ligjit në këtë pjesë të Kosovës. E përgëzoj përkushtimin dhe punën e tyre në këto rrethana të vështira”, citon radio Evropa e lirë shefin e EULEX-it, de Marnak.

Ai u ka bërë thirrje serbëve lokalë të heqin barrikadat.

“Kjo i dëmton njerëzit. Ne kemi ndërmarrë këtë veprim për të përmirësuar fluksin e mallrave dhe mundësinë e njerëzve për të pasur qasje në to. Çdo hap që e pengon këtë, është kundër popullatës”, ka thënë kreu i EULEX-it.