SHBA-ja mbështet shtrirjen e autoritetit të Kosovës në gjithë territorin

Presidentja e Kosovës, Atifete Jahjaga dhe së bashku me kryeministrin Hashim Thaçi dhe zëvendëskryeministrin Behgjet Pacolli, janë pritur në një takim nga Sekretarja Amerikane e Shtetit, Hillary Clinton.

Ajo ka theksuar se SHBA-ja e mbështet fuqimisht sovranitetin dhe integritetin territorial të Kosovës dhe shtrirjen e autoritetit të Kosovës në gjithë territorin e saj.

Sekretarja Clinton ka deklaruar se bashkëpunimi me Bashkimin Evropian dhe misionin e tij në Kosovë për rendin dhe ligjin, EULEX, është i një rëndësie të veçantë dhe kjo shënon një përparim pozitiv dhe i inkurajoi autoritetet e Kosovës që të vazhdojnë të punojnë ngushtë me këtë mision.

Ajo ka vlerësuar se është me rëndësi marrëdhënia e afërt me Bashkimin Evropian.

Clinton ka thënë se SHBA-ja do të vazhdojë angazhimin e saj për ndihmë Kosovës në rrugën e saj drejt integrimeve evropiane.

Sekretarja amerikane e Shtetit ka theksuar se dialogu me Serbinë është e vetmja rrugë përpara dhe përshëndeti përkushtimin e Kosovës për këtë proces. Ajo tha se SHBA-ja po vazhdon t’i inkurajojë shtetet e tjera që të njohin pavarësinë e Kosovës.

Gjithashtu Sekretarja amerikane e Shtetit e inkurajoi thellimin e reformave të brendshme në Kosovë dhe i dha përkrahje liderëve të Kosovës në luftën kundër korrupsionit dhe krimit të organizuar.

Ndërkaq presidentja e Kosovës, Atifete Jahjaga e ka falënderuar sekretaren Clinton për mbështetjen dhe kontributin e vazhdueshëm që SHBA-ja po e jep në procesin e shtetndërtimit në Kosovë dhe për konsolidimit të mëtejshëm të shtetit të Kosovës në arenën ndërkombëtare.

Presidentja e ka njoftuar sekretaren amerikane për progresin e arritur në Kosovë dhe kërkoi mbështetjen e SHBA-së për ta ndihmuar Kosovën në procesin e integrimeve evropiane dhe Partneritetin për Paqe.

Jahjaga ka deklaruar se aksioni në tri komunat veriore është ndërmarrë në bashkëpunim të ngushtë me partnerët ndërkombëtarë si dhe me EULEX-in e KFOR-in, dhe ai ka për qëllim zbatimin e marrëveshjes për vulat doganore dhe është në përputhshmëri me Kushtetutën e Republikës së Kosovës.

Ajo ka thënë se institucionet e vendit janë të përkushtuara që të vendosin rendin dhe ligjin në veriun e Kosovës me partnerët ndërkombëtarë.

Presidentja Jahjaga ka vlerësuar se Ahtisaari Plus nuk është zgjidhje, sepse do të rrënonte të arriturat në Kosovë dhe nuk do të garantonte integrimin, por do të çonte drejt ndarjes.

Presidentja e Kosovës ka thënë se kjo do kthente prapa sukseset e mëdha të dekadës së kaluar në arritjen e paqes dhe të pajtimit në rajon.