Vazhdon dialogu, nuk bisedohet për pikët kufitare 1 e 31

Kërkesa serbe që në raundin e ardhshëm të bisedohet për pikëkalimet kufitare 1 dhe 31 nuk do të realizohet

　

Dialogu ndërmjet Prishtinës dhe Beogradit do të vazhdojë, pavarësisht situatës së krijuar në veri të vendit pas 16 shtatorit.

　

Zyra e ndërmjetësit të bisedimeve i ka ftuar palët për takimin e radhës që duhet të mbahet më 27 dhe 28 shtator.

　

Temat e bisedimeve mbeten ato që janë diskutuar më herët: telekomunikacioni, energjia elektrike dhe prezantimi i Kosovës në nisma regjionale dhe ndërkombëtare, shkruan Koha Ditore.

　

Në raundin e ardhshëm zyrtarët evropianë presin që të sqarohen disa detaje edhe për çështjen e diplomave universitare.

　

Kërkesa e kryesuesit të palës serbe, Borisllav Stefanoviq, që në raundin e ardhshëm të bisedohet për pikëkalimet kufitare 1 dhe 31 nuk do të realizohet.

　

Zyra e Cooperit i ka bërë me dije delegacionet serb se një gjë e tillë nuk mund të ndodhë pa pajtimin e delegacionit kosovar, shkruan kjo gazetë, duke cituar burime të saj.

　

Ekipi serb i dialogut nëpërmjet një letre dërguar baroneshës Ashton ka kërkuar ditë më parë që në dialog të futet edhe çështja e pikëkalimeve kufitare.

　

Përveç refuzimit të kërkesës së palës serbe, Zyra e Cooperit ka sinjale të mira ngatë dyja pakët se janë të gatshme që të vazhdojnë dialogun.

---