Vitin tjetër zhbllokohen 570 milionet e privatizimit

Që nga fillimi i vitit të ardhshëm, kur do të hyjë në fuqi edhe ligji i ri për likuidimin e ndërmarrjeve, do të zhbllokohen edhe 570 milionët e privatizimit të ndërmarrjeve, të cilat mbahen jashtë vendit të bllokuara.

Ky ligj i ri do të mundësojë që 75 për qind e mjeteve pas likuidimit të ndërmarrjeve, që brenda atij 75-përqindëshi do të mënjanohet edhe një shumë e kërkesave, pjesa tepricë do t’i ndahet buxhetit të Kosovës, shkruan Zëri.

“Me ligjin e ri është e rëndësishme që ne tani rreth 570 milionë euro i kemi jashtë shtetit, e që ato tani vihen në funksion, që do të thotë do të zhbllokohen edhe ato, e do të trajtohen rast për rasti dhe pjesa e mbetur do t’i takojë Qeverisë”, ka thënë për “Zërin” Mrika Tahiri, zv.drejtoreshë e Agjencisë Kosovare të Privatizimit.

Ajo ka theksuar se me ligjin e ri të likuidimit të ndërmarrjeve, nuk do të zgjasë më procesi në 42 muaj që ka qenë minimumi, por tani do të zvogëlohet në 20 muaj.