EULEX-i gati për arrestime të deputetëve tjerë!

Sipas një burimi ndërkombëtar "arrestimet e ardhshme kanë të bëjnë pikërisht me ata që janë konsideruar si "peshq të mëdhenj".

Vendimi i Gjykatës Kushtetuese të Kosovës për heqjen e imunitetit të deputetëve ka motivuar Misionin e Bashkimit Evropian për Sundim të Ligjit-EULEX, që të fillojë edhe me arrestime të tjera.

Burime të afërta me misionet ndërkombëtare kanë theksuar se Fatmir Limaj është i pari që ka pësuar nga vendimi i Kushtetueses, ndërsa atë së shpejti do ta pasojnë edhe disa ligjvënës të tjerë, të cilët janë të dyshuar për keqpërdorime dhe krim të organizuar, shkruan Zëri.

“Deputeti Fatmir Limaj është vetëm fillimi”, ka thënë ky burim, i cili bën të ditur se arrestimet e ardhshme kanë të bëjnë pikërisht me ata që janë konsideruar si “peshq të mëdhenj”.

Ai madje ironizon me grupet parlamentare të Kuvendit të Kosovës, duke iu rekomanduar që të “mendojnë për zëvendësimin e deputetëve, sepse disa nga ta nuk do ta ushtrojnë funksionin deri në fund”.

Zëdhënësi i EULEX-it, Blerim Krasniqi, ka deklaruar se vetmja gjë që mund ta konfirmojë është se hetimet e nisura më parë nuk janë ndalur asnjëherë.