Fillon “Java e Biznesit Kosovar 2011”, kërkohet të konsumohen prodhimet e vendit

Java e biznesit do të zgjasë deri më 1 tetor, kurse aktivitetet do të mbahen në gjashtë komunat më të mëdha të Kosovës

Aleanca Kosovare e Biznesit, ka filluar “Javën e Biznesit Kosovar”, ku do të promovohen produktet vendëse, kurse qytetarët do të kenë rastin të blejnë mallra me çmime deri 30 për qind më lirë.

Me këtë rast komuniteti i biznesit edhe njëherë ka kërkuar prej qytetarëve që të konsumojnë produktet vendëse, sepse kjo do të ndikojë në zhvillimin e vendit.

Kurse drejtuesit e institucioneve kanë premtuar mbështetje më të madhe dhe krijim të lehtësirave për bizneset vendore.

Kryetari i AKB-së, Agim Shahini, ka thënë se gjatë këtyre viteve janë angazhuar për të krijuar një lidhje më të fortë mes bizneseve dhe qytetarëve.

Duke u bërë thirrje qytetarëve që të konsumojnë sa më shumë produktet e vendit, Shahini ka kritikuar disa biznese të cilat kanë eksportuar mallra për në Serbi pa treguar se me çfarë dokumentesh.

Ai ka deklaruar se humbja e origjinës së mallit nga bizneset kosovare është e turpshme.

Ai ka thënë se ekonomia e Kosovës njohu një rritje të lehtë pas vendosjes së masave të reciprocitetit ndaj Serbisë dhe Bosnjës, ndërsa heqja e këtyre masave solli një sfidë të madhe për prodhuesit.

Kurse ministri i Zhvillimit Ekonomik, Besim Beqaj ka theksuar se zhvillimi ekonomik i vendit po kalon nëpër sfida të shumta.

Sipas tij, Qeveria e Kosovës para një kohe ka dal me një program për zhvillim ekonomik dhe me diskutimet me asociacionet e biznesit, do të mund të nxirret një dokument shtetëror.

Ministri ka shtuar se biznesi ndihmohet duke adoptuar një legjislacion i cili është i përshtatshëm për biznesin vendës dhe në eliminimin e barrierave.

Aleanca Kosovare e Biznesit organizon për të nëntën herë “Javën e Biznesit Kosovar”, për të sjell më afër qytetarëve prodhuesit dhe për t’u treguar cilësinë dhe rëndësinë e mallit që prodhohet në Kosovë.

Java e biznesit do të organizohet deri më 1 tetor, kurse aktivitetet do të mbahen në gjashtë komunat më të mëdha të vendit.