EULEX-i po e humb përkrahjen te zyrtarët evropianë

Për këtë arsye, shumë shpejt në Bruksel pritet që të mblidhet i ashtuquajturi "grupi korrektues"

Zhgënjimi në punën e EULEX-it po shtohet çdo ditë e më shumë te përfaqësuesit e vendeve anëtare, por një gjë e tillë nuk po thuhet publikisht.

Mungesa e rezultateve konkrete në luftimin e krimit, vështirësitë në veri të Kosovës e sidomos mosunifikimi i vendeve anëtare rreth punës së misionit janë arsyet që përmenden si bazë që po e krijon paaftësinë e misionit për të pasur sukses dhe po e zgjeron pakënaqësinë te vendet anëtare, shkruan Koha Ditore, duke cituar burime ndërkombëtare.

EULEX-i nuk ka arritur që të shpenzojë buxhetin e planifikuar për këtë vit, kanë bërë të ditur burimet.

Për këtë, shumë shpejt në Bruksel pritet që të mblidhet i ashtuquajturi “grupi korrektues”.

Grupi korrektues do të vlerësojë se paratë aktuale i mjaftojnë EULEX-it deri për muajin dhjetor. Megjithatë, ky mekanizëm vetëm do të bëjë propozimin, i cili pastaj do t`i dërgohet Këshillit.

Një diplomat evropian duke ironizuar ka thënë se “një mision që nuk arrin të menaxhojë dhe të shpenzojë buxhetin e vet, nuk mund të pritet se do ta luftojë krimin e organizuar”.

Diplomatët evropianë po hezitojnë që të shprehin pakënaqësitë publikisht për shkak se një gjë e tillë ende vlerësohet se nuk do t`i ndihmonte misionit.