Shtyhet rikthimi i preferencave tregtare me BE-në

Autoritetet kosovare kanë thënë se janë në pritje të rikthimit të preferencave tregtare të cilat i vendos Bashkimi Evropian

Ata konfirmojnë se janë njoftuar se rikthimi i këtyre preferencave është shtyrë për çështje procedurale, dhe nuk ka të bëjë asgjë me zhvillimet politik në vend.

 Zëvendëskryeministrja e Kosovës, njëherazi ministre e Tregtisë dhe Industrisë Mimoza Kusari – Lila, I ka thënë Radion Evropës së Lirë se janë në pritje të rikthimit të preferencave tregtare të Bashkimit Evropian.

 Kusari – Lila, ka breë të ditur se institucionet e BE-së po mundohen që përmes Komisionit Evropian të arrijnë një konsensus që së shpejti kjo çështje të zgjidhet, por nuk është më çështje e cila rëndon dhe pret aktivitet nga institucionet e Kosovës.

Tërheqja e këtyre preferencave tregtare për Kosovën kanë shënuar humbje të mëdha ekonomike në vend.

 Një ndër bizneset e shumta të cilat kanë pësuar nga mos vazhdimi i preferencave tregtare është Vreshtaria dhe Veraria “Stone Castle” në Rahovec. 

Menaxheri i kësaj kompanie, Shani Mullabazi, ka deklaruar se humbjet në këtë kompani janë shumë të mëdha. 

Produktet kosovare që nga fillimi i këtij viti nuk mund të eksportohen në vendet e Bashkimit Evropian, pa iu nënshtruar tarifave doganore apo kufizimeve për sasitë.