Itali: Arrestohen 4 kosovarë të dyshuar për xhihadizëm

Katër të arrestuarit janë me leje të rregullt qëndrimi në Itali, ndërsa dyshohet se i përkasin grupeve radikale islamike

Policia e Italisë ka arrestuar mbrëmë në Venedik katër qytetarë të Kosovës, në mesin e  tyre edhe një të mitur, nën dyshimin se i përkasin grupeve radikale islamike. Siç njoftojnë mediet lokale, katër të arrestuarit janë me leje të rregullt qëndrimi në Itali. Operacioni është koordinuar nga Drejtoria Rajonale e Antimafias e Antiterrorizmit të qytetit të Venedikut.

Gjatë natës janë kryer dhe kontrolle në 12 banesa, 10 prej të cilave në qendrën historike të Venecias, një banesë është kontrolluar në qytetin e Mestre e një në Trevizo, citon oranews.

Operacioni për shkatërrimin e kësaj celule xhihadiste ka nisur pas hetimit të aktivitetit radikal fetar të anëtarëve të saj si dhe të vendeve që ata frekuentonin. Në operacion ka marrë pjesë dhe reparti i Policisë shkencore si dhe grupi i forcave speciale.