Përurohet pjesa e fundit e autostradës së Jura-s, “A16”

Autostrada e gjatë 85 kilometra që fillon në Biel/Bienne dhe përfundon në Delle-Boncourt /JU, në kufirin me Francën, ka kushtuar mbi 6.5 miliardë franga

Me prerjen ceremoniale të shiritit nga ana e presidentes së Federatës, Doris Leuthard është lëshuar sot solemnisht në qarkullim edhe pjesa e fundit e autostradës “transjurane” A16. Përurimi është bërë në regjionin e Jura-s së Bernës ndërsa autostrada e gjatë 85 kilometra  fillon në Biel/Bienne dhe përfundon në Delle-Boncourt /JU, në kufirin me Francën. Në këtë mënyrë ajo mundëson qarkullimin përgjatë Kantonit Jura.

Leuthard në fjalën e saj ka thënë  veç tjerash se me rrugën e re mundësohet që të vihet më shpejt nga Jura në Biel dhe në Liqenin e Bielit. Ndërsa nga ana tjetër, autostrada të lë vetëm 15 kilometra larg Stacionit Hekurudhor francez Belfort-Montbeliard, prej nga mund të shkohet më shpejt me trenin TGV për në Paris.

Pjesa e fundit e autostradës A16 bën shkarkimin nga qarkullimi të vendbanimeve në pjesën e poshtme të luginës Vallee de Tavannes.

Ndërtimi i gjithë autostradës ka zgjatur plot 30 vjet dhe ka kushtuar mbi 6.5 miliardë franga.

Autostrada Transjurane është nisur të ndërtohet edhe në saje të konfliktit të Jura-s në vitet e shtatëdhjeta të shekullit të kaluar, i cili për pak nuk kishte kaluar në konflikt të dhunshëm. Mungesa e lidhjeve më të mira të Juras me pjesën tjetër të Zvicrës ka qenë një ndër argumentet e aktivistëve që kërkonin pavarësimin e regjionit të tyre. Për këtë arsye, në vitin 1979 me rastin e krijimit të Kantonit Jura ndërtimi i kësaj autostrade ka qenë njërin ndër planet e para të qeverisë së kantonit.

Për këtë arsye, A16 është quajtur nga mediat edhe si “autostrada më politike e Zvicrës”.