Bankënotat e vjetra të këmbehen pa afat dhe pa humbur vlerën

Me heqjen e afatit për këmbim, Këshilli Federal adopton praktikën e cila tashmë është e zakonshme në vendet më të rëndësishme industriale

Bankënotat e vjetra zvicerane në të ardhmen do të mund të këmbehen me të rejat, pa humbur vlerën e tyre dhe pa iu përmbajtur ndonjë afati, shkruan srf.ch.

Këshilli Federal në konsultim me Bankën Nacionale të Zvicrës ka propozuar heqjen e afatit që vlen sot sipas të cilit këmbimi i bankënotave mund të bëhet më së largu pas njëzet vitesh nga dalja e tyre prej qarkullimi, transmeton albinfo.ch. Me këtë propozim të qeverisë do të bëhet e mundur që bankënotat të mos e humbin papritur vlerën e tyre gjë që mund të jetë problematike në rastet e trashëgimisë.

Me heqjen e afatit për këmbim, Këshilli Federal adopton praktikën e cila tashmë është e zakonshme në vendet më të rëndësishme industriale.

Departamenti Federal për Financa është ngarkuar me detyrë që deri në  fund të gushtit ta përpunojë një projektpropozim për këtë problematikë.