Publikohet raporti i progresit për Kosovën

Komisioni Evropian ka publikuar Raportin e Progresit për Kosovën. Ushtruesi i detyrës se shefit të Zyrës se Komisionit Evropian në Kosovë, Khaldroon Sinno, ka deklaruar se është shënuar progres në fushën e riatdhesimit. Sinno, duke prezantuar raportin e progresit të KE-së për Kosovën, ka thënë se ka shumë sfida lidhur me veriun, duke thënë se ky është një problem i Kosovës dhe i rajonit dhe është shprehur se duhet të ketë një agjendë gjithëpërfshirëse për veriun dhe qeveria duhet të reflektojë më shumë për veriun.

Lidhur me administratën publike, ai ka thënë se është shumë e dobët dhe duhet të profesionalizohet dhe të zbatojë ligjet që miratohen. Me nota negative është vlerësuar edhe sundimi i ligjit, ndërsa puna e EULEX-it nuk është vlerësuar fare nga KE-ja. “Krimi i organizuar dhe korrupsioni janë sfida shumë të mëdha për Kosovën dhe është bërë shumë pak progres në luftimin e krimeve ekonomike dhe të shpëlarjes së parasë”, ka thënë Sinno. Ai ka thënë se është e paqëndrueshme korniza fiskale dhe i ka bërë thirrje Ekzekutivit që në mënyrë urgjente ta përmirësojë këtë politikë.

Sfidë mbetet edhe sistemi i gjyqësisë, gjithashtu edhe liria e shprehjes nuk vlerësohet në mënyrë pozitive në këtë raport. Ai është shprehur se institucionet e Kosovës duhet të merren seriozisht me gjetjet e këtij raporti. Megjithatë ai ka shprehur opinionin e tij se Kosova nuk është një vend i dështuar.