KEK-u humb 100 milionë euro

Mungesa e energjisë elektrike edhe më tej vazhdon të jetë kancer i ekonomisë kosovare. Përkundër investimeve që kanë kaluar më shumë se një miliard euro, prodhimi i energjisë në vend nuk po mund të mbulojë kërkesat e qytetarëve për energji elektrike, ku si pasojë Korporata Energjetike e Kosovës vazhdon të aplikojë reduktime, sidomos për qytetaret që gjenden në kategorinë B dhe C sipas ranglistës së kësaj korporate.

Raporti i Progresit i Bashkimit Evropian për Kosovën, i cili është publikuar më 12 tetor të këtij viti, thotë se sektori energjetik vazhdon të vuajë nga probleme serioze. Sipas raportit, në Kosovë nuk ka pasur asnjë zhvillim lidhur me sigurinë e furnizimit me rrymë. “Kosova ende nuk ka asnjë strategji për krijimin e nivelit të kërkuar të rezervave të naftës. Implementimi i investimeve dhe mirëmbajtjes në pajtim me planin zhvillimor për transmisionin e energjisë elektrike 2010-2019 e ka bërë sistemin e transmisionit të Kosovës më të besueshëm.

Operatori i sistemit të transmisionit të energjisë elektrike në Kosovë, ende nuk merr pjesë në mekanizmat rajonalë për të planifikuar dhe shpërblyer transitin e energjisë elektrike, për shkak të dallimeve lidhur me statusin e saj”, thuhet në raport. Në raportin e Progresit për Kosovën thuhet se Zyra e rregullatorit të energjisë i ka mbajtur tarifat ekzistuese të energjisë elektrike, për shkak të rënies së çmimeve të importit dhe subvencioneve të vazhdueshme të Qeverisë për Korporatën Energjetike të Kosovës.