Shqipëria atraktive për investimet e huaja

Ministri i Jashtëm i Shqipërisë, Edmond Haxhinasto, ka deklaruar se procesi i integrimit të vendit në ekonomitë e rajonit ka ndikuar që tregu shqiptar të bëhet shumë atraktiv për investime të kompanive të huaja. 

Ai këto komente i bëri me rastin e hapjes së edicionit të trembëdhjetë të Panairit ndërkombëtar “Vjeshtë 2011” në Tiranë, organizuar nga kompania Expo-P.A., i cili synon nxitjen e bashkëpunimit mes bizneseve shqiptare dhe atyre të huaja. 

Shefi i diplomacisë shqiptare ka thënë se prezantimi i novacionit teknologjik në fushën e ndërtimit tregon se ka kërkesa të vazhdueshme për tregun shqiptar, gjë e cila e bën Shqipërinë një vend, i cili përfaqëson një nivel shumë të lartë të zhvillimit industrial, ekonomik dhe tregtar. 

“Fakti që ajo në vazhdimësi garanton stabilitet, garanton vetë rritje ekonomike, tërheqje dhe kërkesë në tregun e saj të brendshëm, por dhe fakti shumë i rëndësishëm që Shqipëria është në një proces të vazhdueshëm integrimi në ekonomitë e rajonit, e bën tregun shqiptar shumë atraktiv për investimet e huaja dhe treguesit janë shumë të qartë”, është shprehur Haxhinasto. 

Në këtë panair po marrin pjesë kompani nga Shqipëria, Gjermania, Greqia, Austria, Izraeli, etj., të cilat njihen në tregun ndërkombëtar për teknologjitë e reja në sektorin e ndërtimit.