Bizneset mund të përfitojnë deri në 1 milion dollarë

Projekti BiD Network planifikon të ofrojë për bizneset e Kosovës ndërlidhje me investitorët e mundshëm

Oda Ekonomike e Kosovës, bashkë me Bussines Suport Centre Kosovo, ka prezantuar projektin BiD Network përmes të cilit synohet që t’u ofrojë ndërmarrjeve të vogla e të mesme ndihma financiare prej 10 mijë deri në 1 milion dollarë.

Projekti BiD Network planifikon të ofrojë për bizneset e Kosovës ndërlidhje me investitorët e mundshëm, përfitim të kredive nga bankat si dhe përfitim nga fondet për ndërmarrje të vogla e të mesme nga e gjithë bota.

“Bid Network ka një komunitet online, ka 40 mijë anëtarë nga e gjithë bota, ku secili biznes që regjistrohet ka mundësi që të shkëmbejë ide me ndërmarrësit e tjerë nga e gjithë bota”, ka thënë Muhamed Rexhepi, zv.drejtor i BSCK-së, shkruan Koha Ditore.

Nëpërmjet këtij projekti, sipas tij, bizneseve në Kosovë do t’u ofrohet ekspertizë falas nga ekspertët ndërkombëtarë të biznesit.

Ndërkaq, Berat Rukiqi, sekretar i Odës Ekonomike të Kosovës, ka deklaruar se ky projekt do t’u ndihmojë bizneseve e sidomos atyre që kanë ngarkesa nga obligimet kreditore ndaj bankave. Fillimisht, sipas Rukiqit, një përkrahje të drejtpërdrejtë do ta ketë sektori i bujqësisë dhe pastaj përkrahja do të vazhdojë me sektorët e tjerë.