Reagojnë myslimanët e moderuar

"Lufta kundër islamofobisë të bëhet pa provokim"

Të shtunën, rreth 2.000 persona marshuan në Bernë kundër islamofobisë. Protestuesit denoncuan “diskriminimin në rritje” kundër myslimanëve në Zvicër. Ndërsa shoqatat myslimane të Zvicrës janë distancuar nga kjo protestë e organizuar nga organizata që përfaqëson Nicolas Blancho.

Pas këtij manifestimi, Shoqata për Koordinimin e Organizatave Islame në Zvicër është duke përgatitur përgjigjen e saj. Ajo parashikon të vërë në këmbë ditën e saj për të luftuar islamofobinë.

“Të mos lejojmë që myslimanët radikalë të monopolizojnë debatin për Islamin në Zvicër”, ky është vullneti i Koordinuesve të Organizatave Islamike (COIS) në shenjë reagimi pas ditës së shtunë të organizuar në Bernë.

I kontaktuar dje nga e përditshmja “Le matin”, Farhad Afshar, kryetar i COIS-së, njoftoi se planifikon organizimin e një dite për temën e islamofobisë pa yje të verdhë apo parulla provokuese: “Nëse duam të luftojmë kundër islamofobisë, atëherë duhet të luftojmë duke bashkëpunuar me forcat liberale të këtij vendi dhe jo nëpërmjet provokimit. Kjo është arsyeja pse ne do të organizojmë një simpozium në fillim të vitit 2012 rreth kësaj teme në Bernë apo në Zürich. Me ç’rast do të mblidhen së bashku shkencëtarë, përfaqësues të palëve politike si dhe personalitete krishtere dhe hebrenje”.