Rënie nataliteti dhe mortaliteti në Kosovë

Krahasuar me vendet e Ballkanit, Kosova pas vitit 2000 ka një rënie shumë të madhe të vdekshmërisë, jetëgjatësia është rritur për 7 vite

Në Kosovë ka rënë numri i lindjeve për 35 për qind, krahasuar me vitet ‘90, mirëpo një ulje të madhe ka pësuar edhe shkalla e mortalitetit pas këtyre viteve.

Ky konstatim doli nga një debat për transicionin demografik në Kosovë, dhe sfidat e mundësitë e saj në botën e 7 miliardë banorëve, i organizuar nga Zyra e Fondit për Popullsi e Kombeve të Bashkuara (UNFPA)　në Kosovë.

Qëllimi i debatit ishte të potencohen dhe të inkurajohet një bisedë rreth çështjeve të popullsisë të cilat pritet ta formësojnë të ardhmen e njerëzimit, shkruan Koha Ditore.

Sipas Avni Kastratit, nga Enti i Statistikave i Kosovës, të dhënat demografike në Kosovë flasin për një nivel të kënaqshëm të mortalitetit, përderisa, sipas tij, nataliteti është në rënie.

“Krahasuar me vendet e Ballkanit, Kosova pas vitit 2000 ka një rënie shumë të madhe të vdekshmërisë, me ç‘rast jetëgjatësia është rritur për 7 vite”, ka thënë Kastrati.