Rroba të punuara nga qumështi!

Materiali i fituar nga qumështi, ka bukuri të ngjashme me mëndafshin ndërsa ka disa përparësi në krahasim me të

Disenjatorja gjermane e modës, Anke Domaske, e cila njëherësh është edhe mikrobiologe, ka provuar me fakte se edhe qumështi është një material që mund të “vishet”!

Por si ka mundësi të realizohet në praktikë diçka e tillë? Domaske ka zhvilluar një stof të punuar qind për qind nga qumështi. Nga materia “casein” që ndahet mbi qumështin që është duke u thartuar, pas tharjes së tij, fitohet një masë pluhuri, i cili kur të trajtohet me ujë prodhon një qull. Nga ky pastaj dalin fijet, të cilat kur të enden, krijojnë stofin e lakmuar.

Materiali i fituar ka bukuri të ngjashme me mëndafshin ndërsa ka disa përparësi në krahasim me të. Tekstili i prodhuar nga qumështi është më i lehtë për t`u bartur, mund të lahet e të thahet ashtu sikur tekstili nga pambuku.

Por, materialin me emrin “Qmilch”, nga materialet e deritashme për veshje, e dallon edhe fakti se është më i përshtatshëm për ambientin dhe u përshtatet në veçanti njerëzve që kanë alergji lëkure.

Nga zbulimi i modelistes gjermane pritet të nxjerrin fitim edhe industria automobilistike dhe ajo e teknikës medicinale.