Rritet importi i veturave, nga 1 janari rregulla të reja

Nga 1 janari e deri më 22 gusht, numri i veturave të importuara është 16 mijë e 885 me ç’rast që në llogarinë shtetit kanë hyrë rreth 18 milionë euro

Qytetarë e kompani importuese janë vërsulur të importojnë vetura të përdorura për të shfrytëzuar muajt e fundit të mbetur të ligjit aktual, i cili e lejon importin e veturave pa kufizim.

Për 8 muaj janë importuar mbi 16 mijë e 800 vetura në Kosovë. Kjo, për njohës të fushës ekonomike siguron rritje të taksave, pasi me futjen në fuqi të ligjit do të ulen të hyrat në buxhet. Ata nuk u besojnë arsyeve të nxjerra nga qeveria për të bërë ligjin e ri, ndërsa besojnë fort se ekzekutivi do të shtojë taksat për t’i mbuluar humbjet.

Zëdhënës i Doganës së Kosovës, Adriatik Stavileci ka thënë pë KTV-në se nga 1 janari e deri më 22 gusht, numri i veturave të importuara është 16 mijë e 885 me ç’rast që në llogarinë shtetit kanë hyrë rreth 18 milionë euro.

Ligji për importin e automjeteve është ndryshuar disa herë, varësisht prej nevojave që Qeveria i ka pasur për të mbushur më së lehti buxhetin e vendit me para.