Zvicra (nuk) i bashkohet BE-së në ashpërsimin e ligjit për armëmbajtje

Duke e propozuar një zgjidhje të "butë" ose "light" për armëmbajtjen qeveria e vendit ka dashur të respektojë traditën e mbajtjes së armës në Zvicër

(KEYSTONE/Ennio Leanza)

Për shkak të shtimit të rrezikut nga terrorizmi, Bashkimi Evropian kohë më parë ka vendosur të  ashpërsojë ligjin për armëmbajtje. Zvicra, si shtet që bën pjesë në Zonën Schengen është e detyruar t`i bashkohet ashpërsimit në fjalë. Një propozim që Këshilli Federal i ka dorëzuar sot parlamentit për shqyrtim, ka shfrytëzuar hapësirën e lejuar të veprimit në raport me ligjin e BE-së.

Në këtë mënyrë, duke e propozuar një zgjidhje  të mesme ose “light” për armëmbajtjen qeveria e vendit ka dashur të respektojë traditën e mbajtjes së armës në Zvicër. Por edhe si i tillë, propozimi është shoqëruar me kritika nga qarqet e shenjëtarëve.

Ndër rregullat që qeveria i ka propozuar duke e shfrytëzuar hapësirën e lirë të veprimit ka qenë ajo që e rregullon armëmbajtjen për ish ushtarët. Kështu, personat që kanë mbaruar shërbimin ushtarak, sipas rregullores së BE-së mund të mbajnë armë vetëm nëse inkuadrohen në ndonjë klub shenjëtarësh. Dhe vetëm atëherë, ata do të kishin të drejtë të bartnin një karikator prej 20 plumbash.