Gjyqi Federal: Lumenga nuk ka falsifikuar

Gjykata Federale ka konfirmuar vendimin lirues të Gjykatës së Bernës, dhe ka hedhur poshtë ankesën e prokurorisë së Bernës

Ish deputeti i Parlamentit Nacional të Zvicrës, i vetmi me prejardhje afrikane, Ricardo Lumenga nuk ka bërë falsifikim votash. Verdikti lehtësues për politikanin me ngjyrë ka ardhur nga instanca më e lartë e gjyqësisë zvicerane, nga Gjykata Federale, shkruan drs.ch.

Kjo gjykatë ka konfirmuar si të drejtë vendimin lirues që më parë kishte marrë Gjykata e Lartë e Bernës, ndërsa ka hedhur poshtë ankesën e prokurorisë së përgjithshme të Bernës.

Sipas akuzës, Lumenga, para zgjedhjeve të vitit 2006 kishte plotësuar vetë 44 fletëvotime. Ashtu sikurse më parë gjykata e lartë e Bernës, edhe gjykata federale është e mendimit se veprimi i Lumengos plotëson figurën e veprës “gjueti në vota”, por është tashmë vepër e vjetruar, që nuk ndëshkohet me ligj.