Turizmi veror në Zvicër, me rritje

Në hotelet e këtushme janë regjistruar 12 milionë bujtje, që është për 6 për qind më shumë se në periudhën e njëjtë të një viti më parë

Moti i mirë që ka mbretëruar gjatë muajve të verës: qershor, korrik dhe gusht, u ka sjellë hoteleve të Zvicrës më shumë turistë se zakonisht. Gjatë periudhës së përmendur në hotelet e këtushme janë regjistruar 12 milionë bujtje, që është për 6 për qind më shumë se në periudhën e njëjtë të një viti më parë.

Siç bën të ditur Zyra Federale për Statistikë në një njoftim të saj, rritja e numrit të vizitorëve ka të bëjë më së shumti me ardhjen e turistëve nga SHBA. Po kështu, rritjes i ka kontribuuar ndërprerja e trendit të rënies së numrit të turistëve nga Gjermania, transmetion albinfo.ch. Gjermanët në fakt përbëjnë numrin më të madh të turistëve që vizitojnë Zvicrën.

Në rastin konkret, në rritjen e këtij tregu ka ndikuar dobësimi i frangut.

Në përgjithësi turizmi zviceran po tregon një trend të qartë të rritjes, ka thënë drejtori i Turizmit Zviceran, Jürg Schmid.