Të maskuarit sulmojnë takimin e ekstremistëve të djathtë: 4 të lënduar

Një grup personash të maskuar kanë hyrë dhunshëm në të dhe kanë hedhur gaz ose sprej lotsjellës, nga i cili janë lënduar 4 veta

Rreth dy javë më parë, rreth restorantit “Trauben” në Bazenheid të Kantonit St. Gallen qe ngritur pluhur në media pasi që shefat e tij kishin refuzuar të shërbenin azilkërkuesit zezakë. Rreth kësaj ka shkruar edhe albinfo.ch, duke u bazuar në raportimet e medieave zvicerane.

Ndërsa mbrëmë sërish ky restorant është bërë lajm i kronikave të zeza dhe i politikës. Një grup personash të maskuar kanë hyrë dhunshëm në të dhe kanë hedhur gaz ose sprej lotsjellës, shkruan tagblatt.ch. Nga gazi i hedhur kanë pësuar lëndime pronarja e restorantit dhe tre mysafirë, të cilët janë dërguar në spital për trajtim.

Në kohën kur ka ndodhur sulmi, në ndërtesën shtesë të restorantit ishin takuar anëtarët e organizatës së ekstremit të djathtë PNOS (Partia e Zviceranëve të Orientuar Kombëtarisht). Ata pasi kanë dëgjuar thirrjet e pronares për ndihmë kanë shkuar të ndihmonin por edhe drejt tyre është hedhur gaz lotsjellës.

Njëri nga këta të fundit, i cili është edhe bashkëthemelues i “Pegida Schweiz”, edhe vetë i lënduar, ka deklaruar se beson që mbapa sulmit qëndrojnë eksremistët e majtë, përcjell albinfo.ch. Por zëdhësi i policisë nuk ka qenë në gjendje të vërtetojë dhe as ta kundërshtojë këtë deklarim.

Autorët e sulmit janë në arrati ndërsa policia kërkon një makinë audi të zezë me tabela tëST. Gallenit, në të cilën besohet të kenë qenë sulmuesit.