Eric Stauffer i hedh ujë në fytyrë Pierre Weiss-it

Në parlament plas një zënkë mes liderit të MCG dhe deputetit liberal

Të premten në mbrëmje gjatë një debati shumë të nxehtë në Parlamentin kantonal të Gjenevës deputeti i Lëvizjes Qytetare të Gjenevës (Mouvement Citoyen Genevois – MCG) i ka hedhur ujë në fytyrë deputetit të Partisë Liberale Radikale, Pierre Weiss, njoftojnë mediet zvicerane.

Duke e kundërshtuar energjikisht linjen hekurudhore Cornavin-Eaux-Vives- Annemasse (CEVA), Eric Stauffer pati provuar katër herë me radhë për ta kthyer projektligjin në Komision dhe, atë në dëm të partive të tjera politike.

Edhe pse pati një ndërprerje të seancës për 5 minuta, kjo nuk mjaftoi për t’i qetësuar shpirtërat, kështu që toni i debatit u ngrit, ku edhe plasi zënka mes deputetit të MCG-së dhe atij të PLR-së.

Pas një diskutimi mes shefave të grupeve parlamentare, Zyra e parlamentit vendosi ta trajtojë këtë incident para mbledhjes së të enjtes. Ajo do të ndalet po ashtu në marrjen e pamjeve të incidentit nga një deputet.

Para një viti, në kafenenë e Parlamentit, një fërkim fizik pati plasur mes Eric Stauffer dhe të gjelbërtit Roberto Broggini. Pas këtij incidenti, këta dy deputetë qenë përjashtuar nga kafeneja deri në muajin prill.