Çfarë kërkon në Coop revista me oficerin nazist në ballinë?

“Jam ndier i shokuar, kur e kam parë se në ballinë të revistës prezantohej një oficer SS”. Fjala është për oficerin Hans Dorr (1912-1945) të cilit i është kushtuar ky numër i revistës

Në kioskun e një filiali të rrjetit të marketeve “Coop” është gjetur sot një revistë që nuk e ka vendin aty dhe askund tjetër. Bëhet fjalë për revistën me përmbajtje naziste  “Schwerterträger” nga Gjermania. Kjo revistë është botim i shtëpisë botuese “Lesen und Schenken” me pronar Dietmar Munier, një botues i njohur për faktin se shpërndan literaturë të ekstremit të djathtë.

Revista e cila sot është gjetur në vitrinat e një coop-i në Letzipark, ishte numri i dytë i këtij viti, shkruajnë mediat zvicerane.

Edhe vetë përgjegjësit e Coop-it janë shprehur të befasuar me këtë që ka ndodhur, pa dijen e tyre, transmeton albinfo.ch. Duket se revista ka “aterruar” në shitoren e tyre si pasojë e një gabimi të bërë nga furnizuesit.

Këtë gabim e ka zbuluar rastësisht Dominik Gross, historian i ekonomisë, derisa po shikonte në vitrinat e kioskut “Jam ndier i shokuar, kur e kam parë se në ballinë të revistës prezantohej një oficer SS”. Fjala është për oficerin Hans Dorr (1912-1945) të cilit i është kushtuar ky numër i revistës, përcjell albinfo.ch. Ai njihet si njëri ndër 20 pjesëtarët e njësisë SS, të cilët janë dekoruar me urdhrin e Kalorësve të Kryqit. Në dekoratë shihet një shpatë dhe së këndejmi bartësit e kësaj dekorate janë quajtur “Schwertenträger” (bartës të shpatës).