Këshilli i Evropës nuk ka marrë ftesë për vëzhgimin e zgjedhjeve

Raportuesi për Kosovën në Asamblenë Parlamentare të Këshillit të Evropës, Bjorn Von Sydow, u bëri thirrje qytetarëve të Kosovës që të dalin në votime më 12 dhjetor.

Raportuesi i Asamblesë Parlamentare të Këshillit të Evropës, von Sydow, gjatë takimit që pati të martën me kryetaren e KQZ-së, Valdete Daka, ka thënë se nuk do të ketë vëzhgues të Këshillit të Evropës për zgjedhjet e 12 dhjetorit në Kosovë. Ai ka sqaruar se nuk ka pasur ftesë zyrtare nga institucionet e Kosovës për të dërguar vëzhgues.

Ndërkohë, Sydow u shpreh i impresionuar me përgatitjet e KQZ-së për zgjedhjet e përgjithshme, në një kohë kaq të shkurtër. Ai shfaqi po ashtu shpresën që të mos përsëriten gabimet nga zgjedhjet paraprake, të cilat, sipas tij, kanë pasur vonesa në shpalljen e rezultateve përfundimtare.